بالتفصيل..مهندس كهربائي يسلط الضوء على التحديات التي تواجه قطاع الكهرباء بالسودان

القيادة-الخرطوم: أدلى مهندس كهرباء ببعض التصريحات فيما يختص بقطاع الكهرباء بالسودان محددا بعد المشاكل التي توجد بالقطاع و التي حاول مهندسي السودان جاهدين حلها دون المساس براحة المواطن.

و ذكر تاج الدين علي سليمان بعض التحديات التي تواجه القطاع حاليا بالسودان، حيث فصل تاج الدين في تقرير أورده على صفحته بموقع “فيس بوك” تلك التجديات، فكتب:

“في قطوعات في الكهرباء كانت و ما زالت مستمرة وحتى تظل مع عدم الشفافية و تغبيش الراي العام و عدم تحمل المسوؤلية الكاملة.
اولا : موضوع الصيانات بالتم بمهندسين اجانب (ألمان و هنود) هل تعلم انو المهندسيين السودانيين في محطات التوليد الحراري شغالين بدون اسبيرات ليهم فتره طويلة بحلول مبتكره لاستقرار و استمرارية التوليد، يوجد مهندسين حاملين شهادات معترف بها دوليا مثل CSWIP III و Vibration و بدليل كل سنه بتم تكريمهم في مستوى الأداء في العمل و مثال للمهندس الناجح في شركة الكهرباء السعودية, كانوا يوم من الايام العصب في محطة كوستي و محط بحري ومجمع محطات قري، تم تشريدهم بقصد او بدون قصد او بسبب سياسات خاطئه كانت تمارس و الآن يوجد شباب لا غبار عليهم بس عايزين الدعم و الثقة سعادتكم سائرون في نفس الدرب لو لم تعترفو بالحقيقة و تصححوا المسار سينهار هذا القطاع، و من المتعارف عليه حسب سياسة و رؤية الدولة انو في شركات متخصصة حتي في اوربا و الخليج بتجي المحطات تصين الصيانات الكبيرة و في دول عندها اتيام صيانة تبع الشركة و الدولة، اما نحن سياسة شركتنا و الدولة ما متبنية السياسة و الرؤية الواضحة . لكن اذا الشركة تبنت توطين الصيانات الكبيرة كلنا متاكدين المهندس السوداني قادر على عمل هذه الصيانات و الان في مقترح مقدم لتوطين الصيانات الكبيرة و ليهو اكتر من سنتين و للآن للأسف الشركة لم تبدي الجدية.
#تانيا: اذا محطة كوستي، شغالة بثلاث وحدات من اصل اربعة #هل مكنة واحده واقفه من بداية الكرونا الان حصل قطوعات ده بمثل مشكله كبيره؟! بدليل كان في استقرار في فترة رمضان يمكن القطاع الصناعي و الاستهلاك م كان كتيره لكن ده السبب الاساسي
#تالتا : محطة قري3، اذا فرضنا جدلا اكتمل المشروع بالرغم من الماخذ العليه، #هل بتقدر تدور فيهو مكنة ؟! #هل الان سعادتك بتقدر تواجه المواطن بالحقيقة؟! و من المعلومات المعروفة لاي مهندس انو مشروع قري 3 بشتغل بالدور الفردية اولا، هل سعادتك في ليها وقود؟! و من ثم الدورة المشتركة،
#رابعا : الاسبيرات و الوقود من اهم أساسيات و موقومات التوليد الحراري، اذا ديل متوفرات عندك توليد متاح، و اذا ماف انت كهربتك ماف، #هل فترة الصيانة وردت الاسبيرات المطلوب في فترة صيانة المحطات مع تخزين الوقود؟! #سعادتكم هل بتقدر تواجه الشعب المغلوب علي امره بالحقيقة؟! اخر بآخره و اخر عقد اسبيرات كان متى؟؟!
#خامسا: والله حاسين بمعناتكم و الشباب شغالين ليل نهار و طيلة فترة الحظر و بل الشباب تركو اسرهم و قفلوا روحهم في المحطات طيلة فترة رمضان عشانكم كل الشباب، بالرغم من الصعوبات بالتواجه من عدم تقدير معنوي و مادي
#سادسا: من اهم القطاعات في أي دولة و نهضتها هي قطاع الكهرباء و الاهتمام بها من تطوير في الكادر البشري و المعدات و بنية تحتية و الجارة اثوبيا ما بعيدة مننا و سد النهضة، واحده من اسباب تدهور اي قطاع إهمال الجانبي التطويري في الكادر البشري انظر إلى تدهور قطاع التعليم و الصحة في السنين المضتت كيف ضعف المرتب و إهمال التدريب ادي الي نتيجة كارثية.
#سابعا: الآن محطة بحري واقفه هل سعادتك بتقدر تواجه المواطن بالحقيقة؟
#سعادتكم ان كنتم تعلموا الحقيقة و لا تملكها للمواطن هذا مصيبه و ان كنتم لا تعلمون تلك مصيبة اكبر.
اخيرا سعادتكم همنا كلوا انو نبي السودان لكن بالشفافية و الحقيقة و نقول الحقيقة المره. ايها المواطن المغلوب على أمره ما حنقدر نستغني عن التوليد الحراري بالرغم من انو مكلف و أتمنى ما يحصل زي ما حصل بعد حل الهيئة القومية للكهرباء لانو انحنا يداب بنعافر كدولة نامية و الناس بالتروج للطاقات البديلة نعم ده حل ممتاز لكن مستقبلي و عايز ثقافة شعب و جيل، قطاع الكهربا بعاني والله بودنا نديكم نور عيونا”.

نورا محمد-صحيفة القيادة