مأساة بنك الخرطوم..عملاء يشتكون من تعرضهم “للإهانة” مقابل الخدمة المقدمة لهم

0

القيادة-الخرطوم: انتقد أحد المواطنين الخدمات المقدمة من بنك الخرطوم، و استعرض عبر موقع “فيسبوك” ما يعانيه عملاء البنك من الوقوف على صفوف الإنتظار لبدء معاملاتهم المالية.

و أظهرت التعليقات الإستياء العارم من قبل المتعاملين بالبنك حول ساعات الإنتظار و سوء الخدمة.

حيث علق العملاء: “كلامك صاح لان بنك الخرطوم الوحيد اللي عملائة موقفينهم صفوف وبرة في الشمس في حين مفترض البنك يحترم عملاؤه”
،،
“دا بنك ما بحترم العميل دا غير الشبكه الطاشه طبيعي دي ..
بطريقتو دي حيطفش الناس وحيفلس”
،،
و تحدث البعض عن رداءة الخدمات بالبنك و تم تصنيفه كأسوأ بنك على لسان عملائه:
“اسوء بنك اتعاملت معاهم عدم احترام للعملاء وانتظار بالساعات وبعد دا كلو غلط لي في اسمي وفي فروع طواالي في حالة الشبكة طاشه ، انتو ماقدر العدد دا ماتفتحو حسابات جديده ”
،،
“اسوأ بنك في التعامل مع العملاء”

كما ذكرت التعليقات سوء خدمة “مباشر” و التي يستخدمها البنك لتلقي الإستفسارات و الخدمات الأخرى مثل تفعيل البطاقة المصرفية و تفعيل تطبيق بنكك الخاص بالبنك، و ذلك أن خدمات “الكول سنتر” غير متاحة معظم الوقت و قد يستحيل الوصول لموظفيها.

و أظهر كثيرين امتعاضهم و وصفوا الخدمات المتلقاة بعد عناء انتظار ك”شحدة” لأموالهم التي تعد مصدر الاستثمار للبنك و طالبوا بأن يتم احترام العميل كمصدر رزق للبنك لاعتماد البنوك أموال عملائها في تحركات البنك و استثماراته.

و يشار إلى أن تطبيق “بنكك” قد يعرض الحسابات للإختراق عن طريق ادخال الرقم السري بطريقة خاطئة ثلاث مرات لأي حساب و إغلاقها مما يهدد أمن المستخدمين و العملاء بالبنك.

و جاء ذلك عبر ذكر  عبد الرشيد الشهير ب “تايلندي أسمر” من هواة التكنولوجيا و أحد المستخدمين للتطبيق على صفحته بموقع فيسبوك  حيث قدم عرضا لتلك المشكلة بالتطبيق مخاطبا إدارة البنك:

“مشكلة كبيرة جدا اي زول ممكن يقفل حساب اي زول تبع بنكك يقفلو بي مشكلة انك دخلتا كلمة ٣ مرات !!!
معقولة يا مهندسين بنك الخرطوم ؟ Bank of Khartoum
بتحصل كيف ؟
اوريك ونشرح فرضا حولت ليك قروش ورسلت لي الاشعار ظاهر فيو ال ١٦ رقم تبع حسابك عادي جدا بشيل ال ٧ ارقام منو واحاىل ادخل على حسابك من موبايلي تلاتة مرات وطق !!! حسابك قفل الا تضرب لي بنكك عشان يعملو رست ليو تاني ممكن اكرر العملية !!!!
يعني لو ف زول داير يحتال عليك ساي بترسل ليو رقم حسابك ممكن يقفلو ليك ويزور ليك اشعار تحويل وانت لا تعرف تخش حسابك تنجز ليو خدمتو القدما مقابل المال لا تعرف قروشك وصلتك الا تحل الاشكالية مع الكول سنتر تخيل بس !!!!

١/فايدة ربط السيريال نمبر للاجهزة شنو ؟ مش عشان لمن زول يجي يحاول يخش حسابي يجيك اول السيريال لو ما هو يقول ليو دا ما هو ؟

٢/عشان كدا ديمة الكول سنتر مشغول ؟

الحلول
١/اي صاح سيكيورتي انو الزول يدخل الباسويرد ٣ مرات مفروض يحصل بلوك
الحل بدل تعقدو الشغلة كدا يا رست عبر الصراف الالي بي بطاقة العميل يا عبر الايميل واسئلة الامان

٢/ما بنفع معاكم الحل الفوق دا ؟ اعملو جك لي ال imei للجهاز حق الزول لو طلع ما مطابق يديو رسالة ما مطابق حتى لو دخل الباسويرد مليار مرة حسابو ما ح يتقفل كدا لانو اديتو شرط وما اتحقق

3/ بعد يدخل كلمة السر يصل كود ف الايميل حقو و رقم تلفونو وبعد داك يخش ودا كدا لا دايرة انو خشا من تلفون تاني لاغيرو”.

كما ناشد العملاء عبر التعليقات ادارة البنك لوضع حلول لهذه الشكاوى المقدمة و الإتجاه لتحسين التعامل مع متلقي الخدمة البنكية من بنك الخرطوم.

 

نورا محمد-صحيفة القيادة

 

 

 

Leave A Reply

Your email address will not be published.

تسعة + خمسة عشر =